Himilo – Hay’adda Save the Children ayaa sheegtay in ugu yaraan 21,000 carruur ah lagu dilay Marinka Gaza tan iyo markii uu dagaalku billowday 1,000 maalmood ka hor, halka boqollaal kun oo kale ay ku barakaceen, waxbarashadiina ay ka go’day.
Hay’addu waxay sheegtay in ku dhowaad 800,000 carruur ah, oo u dhiganta 80% carruurta Gaza, ay barakaceen, halka 625,000 carruur ah oo gaaray da’da iskuul ay waayeen saddex sano oo waxbarasho rasmi ah. Waxa kale oo ay xustay in 245,000 carruur ah ay halis ugu jiraan ama ay la ildaran yihiin nafaqo-darro, sababo la xiriira gargaarka bani’aadannimo oo weli aad u xaddidan.
Agaasimaha Save the Children ee Bariga Dhexe, Waqooyiga Afrika iyo Bariga Yurub, Ahmad Ahendawi, ayaa sheegay in dunidu ay ku fashilantay ilaalinta hal milyan oo carruurta Gaza ah 1,000-kii maalmood ee la soo dhaafay, maaddaama aan la joojin dilka iyo dhaawaca carruurta.
Carruur la hadlay hay’adda ayaa sheegay inay ku nool yihiin cabsi joogto ah, balse ay weli rajeynayaan nabad iyo inay dib ugu laabtaan guryahooda iyo waxbarashadooda.
Hay’addu waxay sidoo kale soo xigatay warbixin ay soo saareen guddi baaritaan oo Qaramada Midoobay ah, kaas oo ku eedeeyay Israa’iil inay si ula kac ah u beegsatay carruurta Falastiiniyiinta, iyadoo lagu tuhunsan yahay dambiyo ay ka mid yihiin xasuuq, dambiyo ka dhan ah aadanaha iyo dambiyo dagaal.
Save the Children ayaa ku baaqday xabbad-joojin degdeg ah oo waarta, isla-xisaabtan laga sameeyo dambiyada loo geystay carruurta, iyo in la joojiyo hubka loo dhoofiyo Israa’iil.
Hay’addu waxay xustay in inkastoo xabbad-joojin la gaaray bishii Oktoobar 2025, weerarrada Israa’iil ay weli ka socdaan Gaza, halka tirada guud ee dhimashadu ay kor u dhaaftay 73,000 qof, burburka baaxadda leh ee ka dhashayna uu qaadan doono sannado dib u dhiskiisa.
