Himilo – Manchester United ayaa la werinayaa in ay ka baxeen doonistii ay u hayeen xiddiga RB Leipzig daafaca ugu ciyaara ee Dayot Upamecano.
Kooxda Premier League waxay muddooyinkii danbe baadi goob ugu jirtay daafac si ay u horumariyaan daafacooda dhexe.
22-jirkaan u dhashay qaranka France ayaa heshiiskiisa lagu burburin karaa qiimo dhan £38 milyan.
Si kastaba si ay ku warrameyso The Athletic, United ayaa biyo qabow ku shubtay xiisaha ay u qabeen laacibkan, iyada oo ay hadda ugu cadcaddahay naadiga Bayern Munich oo si weyn u daneeneysa.
Kooxda hanatay horyaalka qaaradda Yurub sannadkii tegay ayaa raadineysa beddelka xiddigaha David Alaba iyo Jerome Boateng, kuwaasi oo la filayo in Allianz Arena ka tegaan 2021.
