Himilo – Safaaradda Mareykanka ee ku taalla Israa’iil ayaa Khamiistii soo saartay digniin amni, iyadoo mamnuucday in shaqaalaheeda iyo qoysaskooda ay ka safraan meelaha ka baxsan Tel Aviv, Jerusalem, iyo Beersheba, xilli ay isa soo tarayaan wararka sheegaya weerar laga yaabo in lagu qaado Iran.
Qoraal rasmi ah oo ka soo baxay safaaradda ayaa lagu sheegay in xayiraadda ay sii jiri doonto “illaa amar dambe” sababtuna tahay “kacsanaanta guud ee gobolka.”
“Shaqaalaha dowladda Mareykanka iyo qoysaskooda waxaa laga mamnuucay inay ka baxaan aagga weyn ee Tel Aviv (oo ay ku jiraan Herzliya, Netanya, iyo Even Yehuda), Jerusalem iyo Beersheba,” ayaa lagu yiri bayaanka.
Safaaradda ayaa intaas ku dartay in socdaalka u dhexeeya saddexdan magaalo uu weli furan yahay, oo ay ku jirto galitaanka iyo ka bixitaanka Garoonka Ben Gurion iyo waddada Route 1 ee isku xirta Tel Aviv, Jerusalem iyo buundada Allenby ee u gudubta dalka Urdun.
Digniin ku wajahan muwaadiniinta Mareykanka
Safaaradda Mareykanka waxay si gaar ah ugu digniisay muwaadiniinta Mareykanka ee ku sugan Israa’iil in ay muujiyaan “feejignaan dheeraad ah” oo ay ka war hayaan goobaha gabaadka, siiba marka ay dhacaan weerarro lama filaan ah oo ah:
-
Gantaallo,
-
Madaafiic
-
Diyaarado aan duuliye lahayn.
“Deegaanka amniga waa mid isbeddel degdeg ah leh,” ayay safaaraddu ku warantay.
Xiisad sii kordhaysa: Israel iyo Iran
Warbaahinta Mareykanka ayaa qortay in Isra’iil ay qorsheynayso weerar militari oo ay ku qaado Iran, si ay uga hortagto barnaamijkeeda nukliyeerka.
Talaadadii, Mareykanka wuxuu amray in qaar ka mid ah shaqaalaha safaaradaha iyo qoysaskooda laga daadgureeyo qaar ka mid ah xarumaha gobolka.
Madaxweynihii hore ee Mareykanka, Donald Trump, ayaa Arbacadii xaqiijiyay in laga yaabo in shaqaale Mareykan ah la daadgureeyo, isagoo sheegay in goobo badan oo gobolka ah ay noqon karaan kuwo khatar ah.
Iran oo hanjabaad dirtay
Wasiirka difaaca Iran, Aziz Nasirzadeh, ayaa Arbacadii ku hanjabay in haddii dagaal dhaco, Iran ay beegsan doonto saldhigyada Mareykanka ee gobolka.
Xiisadda ayaa cirka isku sii shareertay iyadoo ay hakad galeen wadahadalladii ku saabsan barnaamijka nukliyeerka ee u dhexeeyay Mareykanka iyo Iran.
“Qodobka ugu adag ee wali muranka ka taagan yahay waa barnaamijka uranium-ka ee Iran,” ayaa lagu yiri warbixinaha diblomaasiyadeed.
Mareykanku wuxuu dalbanayaa in Iran gebi ahaanba joojiso barnaamijkeeda uruurinta uranium-ka, halka Iran ay ku adkaysanayso in arrintaasi aanay gorgortan ka galayn, heshiis ha jirro ama yuusan jirinba.
