Himilo – Ra’iisul Wasaaraha Australia, Anthony Albanese, ayaa Axaddii sheegay in Israa’iil ay “si cad” u jebinayso sharciga caalamiga ah iyadoo si ula kac ah u hor istaagtay gargaarka bani’aadantinimo ee shacabka Gaza, sida uu baahiyey telefishinka maxalliga ah ee ABC.
Albanese oo ka hadlayay barnaamijka “Insiders” ee ABC, ayaa ku tilmaamay xaaladda burburka ah ee ka jirta Gaza mid “aan gabi ahaanba la difaaci karin.”
“Waxaan leenahay xeerar dagaal oo jira sabab u gaar ah: si loo badbaadiyo nolosha dadka rayidka ah… Waxaa si cad u muuqata in jebinta sharciga caalamiga ah ay tahay in la joojiyo bixinta cuntada, taas oo Israa’iil ay go’aansatay bishii Maarso,” ayuu yiri.
Wuxuu sidoo kale sheegay in: “Sharciga caalamiga ah ma ogola in dadka rayidka ah lagu ciqaabo wax aanay lug ku lahayn.”
Mar uu ka hadlayay tallaabada Faransiisku qaaday ee ku aaddan aqoonsiga dowlad Falastiin, Albanese wuxuu sheegay in Australia aysan qorshayn inay si degdeg ah u raacdo, balse ay diyaar u tahay inay tixgeliso haddii la helo duruufo suurtagelinaya sii jiritaanka dawladnimo dhab ah oo Falastiin ah.
“Go’aan kasta oo aan qaadno wuu ka fogaan doonaa inuu ahaado calaamad siyaasadeed oo madhan. Waxaan u aragnaa in la gaaro xal dhab ah haddii duruufaha loo baahan yahay la buuxiyo,” ayuu yiri.
Albanese wuxuu sidoo kale muujiyay in xal laba-dowladood ah uu u baahan doono in si buuxda wax looga qabto dib-u-dhiska Gaza iyo Daanta Galbeed, iyo weliba xallinta arrinta degmooyinka gumeysiga ah ee Israa’iil dhistay.
Isagoo ka hadlayay khasaaraha rayidka, wuxuu yiri: “Ilmo 1 sano jir ah ma aha dagaalyahan ka tirsan Xamaas. Khasaaraha rayidka ah iyo dhimashada ka dhacaya Gaza waa wax aan la aqbali karin.”