Himilo – Ciidamada Jamhuuriyadda Islaamiga ah ee Iiraan ayaa sheegay inay ilaalinayaan kaabayaasha istiraatiijiga ah iyo hantida dadweynaha, iyagoo ugu baaqay shacabka Iiraan inay ka hortagaan waxa ay ku tilmaameen “shirqoollada cadowga”, kaddib markii Madaxweynaha Mareykanka Donald Trump uu digniin cusub u diray hoggaamiyeyaasha Iiraan, xilli ay sii kordhayaan dibadbaxyada ka dhanka ah dowladda.
Bayaan ay Sabtidii daabaceen warbaahinno si dadban ula xiriira dowladda, ayay ciidamadu ku eedeeyeen Israel iyo “kooxo argagixiso oo cadow ah” inay doonayaan qalqal-gelinta amniga guud ee dalka, xilli Tehran ay xoojinayso dadaallada lagu xakameynayo dibadbaxyadii ugu ballaarnaa sannado badan, kuwaas oo ka dhashay caro laga qabo sicir-bararka iyo kharashka nolosha, isla markaana ay ku dhinteen tobananeeyo qof.
Sidoo kale, Ciidamada Ilaalada Kacaanka Islaamiga ah (IRGC) — oo si gaar ah uga madaxbannaan ciidamada caadiga ah — ayaa ku dhawaaqay in ilaalinta guulihii Kacaankii Islaamiga ahaa ee 1979 iyo amniga dalka ay yihiin “khad cas” aan la dhaafi karin, sida ay baahisay telefishinka dowladda.
Dhanka kale, Xoghayaha Arrimaha Dibadda ee Mareykanka Marco Rubio ayaa mar kale muujiyay taageerada Washington ee shacabka Iiraan, kaddib markii dowladda Iiraan ay jartay internet-ka si ay u xakameyso dibadbaxyada rabshadaha wata. “Mareykanku wuxuu garab taagan yahay dadka geesiyaasha ah ee Iiraan,” ayuu Rubio ku qoray barta X.
Hadalkan ayaa yimid saacado kaddib markii Trump uu soo saaray digniin kulul, isagoo u sheegay hoggaamiyeyaasha Iiraan: “Haddii aad bilowdaan rasaas, annaguna waan bilaabi doonnaa.” Trump wuxuu sheegay in hoggaanka Iiraan uu ku jiro xaalad adag, isagoo ku celiyay hanjabaad hore oo ku saabsan weerar militari haddii dibadbaxayaasha nabadda ah la dilo.
Dibadbaxyada ayaa ka socda guud ahaan Iiraan tan iyo 3-dii Janaayo, waxaana kiciyay sicir-barar xooggan iyo baaqyo sii kordhaya oo lagu dalbanayo in la soo afjaro nidaamka wadaaddada ee dalka ka talinayay tan iyo Kacaankii Islaamiga ahaa ee 1979.
Warbaahinta dowladda ayaa ku eedeysay “rabshad-wadayaal” inay dab qabadsiiyeen dhisme dowladeed oo ku yaalla Karaj, galbeedka Tehran. Telefishinka Press TV ayaa baahiyay aaska xubno ka tirsan ciidamada ammaanka oo lagu dilay dibadbaxyada ka dhacay Shiraz, Qom iyo Hamedan, halka muuqaallo ay baahiyeen warbaahinno Af-Faarsi ku hadla oo dibadda ku sugan ay muujiyeen dibadbaxyo cusub oo ballaaran oo ka socda Mashhad iyo Tabriz.
Dibadbaxyadan ayaa ah kuwa ugu waaweyn tan iyo kacdoonnadii 2022–2023, oo ka dhashay geeridii Mahsa Amini, oo ku dhimatay xabsi kaddib markii loo xiray ku xad-gudubka xeerarka labiska dumarka.
Hay’adda Amnesty International ayaa sheegtay in xiritaanka guud ee internet-ka uu yahay isku day lagu qarinayo xadgudubyo culus oo xuquuqda aadanaha ah. Halka hay’adda Iran Human Rights oo fadhigeedu yahay Norway ay sheegtay in ugu yaraan 51 dibadbaxayaal ah, oo ay ku jiraan 9 carruur ah, ay dileen ciidamada ammaanka, boqolaal kalena ay ku dhaawacmeen.
Ugu dambeyn, wasiirrada arrimaha dibadda ee Australia, Canada iyo Midowga Yurub ayaa si wadajir ah u cambaareeyay tallaabooyinka Iiraan, iyagoo ugu baaqay dowladda Tehran inay si degdeg ah u joojiso adeegsiga xoog xad-dhaaf ah iyo mid dilaa ah oo ka dhan ah dibadbaxayaasha.
good
nice one