Radio Himilo
Muqdisho – Tababaraha naadiga Chelsea, Antonio Conte ayaa xaqiijiyay in weeryahanka kooxda Alvaro Morata uu kusoo laabtay safka naadiga waxaana laga yaabaa in uu u safto Blues-ka kulanka Champions League ee Roma habeen danbe.
Kadib markii uu si xoogan ku bilowday xilli ciyaareedkiisii koobaad ee England isagoo 7 gool dhaliyay sideed kulan, ciyaaryahanka reer Spain ayaa dhaawac uu soo gaaray dhamaadkii bishii hore waxaana dhaawac muruqa ah kasoo gaaray kulankii Manchester City.
Kooxda Morata ee Chelsea ayaa guuldarro 1-0 ah kala kulantay naadiga Crystal Palace kulankoodii Isbuucaan ee horyaalka.
Isagoo la hadlayay suxufiyiinta Conte ayaa yiri: “Alvaro waxa uu ku jiraa safka berrito, waxaana uu tababar la qaatay kooxda.”
Chelsea ayaa hoggaanka u heysa Group C, iyadoo badisay labadii kulan ee ay ciyaartay ilaa iyo haatan koobka horyaalada Yurub.
