Radio Himilo
Himilo-Kooxda kubadda cagta Chelsea oo xajisan weyday guul gacanteeda ku jirtay, waxaanay ogolaatay in Arsenal ay laba gool ka dhaliso lix daqiiqadood gudahood xilli ay ciyaartu sii dhamaanaysay, waxaanay labada kooxood ee reer London ku heshiiyeen barbarro 2-2 ah.
Chelsea ayaa laba gool oo midkood rikoore ahaa ku hoggaaminaysay ciyaarta illaa intii laga soo gaaray daqiiqaddii 77aad, markaas oo Arsenal ay ka faa’iidaysatay laba qalad oo ay sameeyeen ciyaartoyda Chelsea oo sababay in laba gool ay dhaliyaan.
Daqiiqaddii 15aad ee ciyaarta ayaa Chelsea ay hoggaanka ciyaarta ku qabatay rikoore uu u dhaliyey Palmer.
Blues oo garoonkeeda joogtay oo labadii ciyaarood ee ugu dambeeyey guulo kasoo hoysay kulamadeedii horyaalka Premier League, ayaa si adag uga halgantay khadka dhexe, waxaana fursad fiican ka lumiyey Raheem Sterling, halka Mudryk uu ahaa khatarta khalkhalinaysay difaaca Arsenal.
