Radio Himilo
Himilo- Kooxda Arsenal ayaa lagu soo waramayaa inay bartilmaamedsaneyso 17 jirka weerarka uga ciyaara kooxda Flamengo Reinier Jesus si uu ugu noqdo badalka Pierre-Emerick Aubameyang ka hor xagaaga soo socda.
Warar soo baxayay ayaa sheegayay in Aubameyang gooldhaliyaha ugu sareeya kooxda xilli ciyaareedkan uu ka fiirsanayo ka bixitaanka Emirates iyadoo kooxda ay sii waday halganka ay ku hoos samaynayaan Unai Emery.
Cabsida bixitaan eeweeraryahanka reer Gabon ayaa sii korodhay bishii hore ka dib go’aankii ciyaaryahanka ee ahaa inuu dib u dhigo wadahadalada qandaraas kordhinta kooxda Waqooyiga London ka dhisan.
Sida laga soo xigtay The Sun, Arsenal ayaa isha ku heysa xiddiga reer Brazil ka hor inta ayna suuragal noqon inay lumiso Aubameyang marka uu furmo suuqa kala iibsiga xagaaga.
Reinier ayaa soo jiitay indho indheeyayaasha Arsenal iyo qaab ciyaareedkiisa hogaamiyaasha horyaalka Brazil ee xilli ciyaareedkan, isagoo dhaliyay afar gool 12 kulan oo uu u saftay.
Waxaa la soo jeediyay in Aubameyang ay Barcelona ku qiimeyneyso inuu yahay bedelka suurtagalka ah ee Luis Suarez.
