Himilo – Canada ayaa ku dhawaaqday inay laba sano xadidayso qaadashada ardayda ajnabiga ah ka dib markii koror weyn uu ku yimid sannadihii u dambeeyay, taasoo saameyn ku yeelatay guryaha la kireysto.
Sannadkii hore, Canada waxay bixisay ku dhawaad hal milyan oo oggolaansho waxbarasho, taasoo saddex jibbaar ka badan tobankii sano ee la soo dhaafay, sida laga soo xigtay xogta dowladda. Qorshaha cusub wuxuu yareyn doonaa tiradaas ku dhawaad saddex meelood meel.
Wasiirka Socdaalka Canada, Marc Miller, ayaa sheegay in dowladda Liberal-ku ay soo bandhigi doonto xad ku-meel-gaar ah oo laba sano ah oo ku aaddan fiisaha ardayda, taasoo keeneysa in qiyaastii 364,000 fiiso la bixiyo sanadka 2024.
Qorshayaasha cusub waxay sidoo kale xadidi doonaan oggolaanshaha shaqom kadib qalin-jabinta ee la siiyo ardayda ajnabiga ah, taasoo laga yaabo inay ku dhiirrigeliyaan inay ku noqdaan dalalkooda. Dadka ku jira barnaamijyada mastarka ama PhD-da ayaa xaq u yeelan doona oggolaansho shaqo oo saddex sano ah.
Aqbalaadda codsiyada cusub ee oggolaanshaha waxbarasho sanadka 2025 waxaa dib loo eegi doonaa dhamaadka sanadkan.
Canada ayaa noqotay meel caan ku ah ardayda caalamiga ah maadaama ay si fudud u helaan oggolaansho shaqo kadib dhammaystirka koorsadooda.
Hase yeeshee, kororka ardayda caalamiga ah ayaa sababay yaraanta guryaha la kireysto, taasoo sare u qaaday kirada. Bishii Diseembar, kirada guryaha ee dalka oo dhan ayaa kor u kacday 7.7% marka loo eego sanadkii hore, sida laga soo xigtay Statscan.