Radio Himilo
Himilo FM –Warbixinada maanta ayaa sheegaya in laacibka PSV Eindhoven garabka uga ciyaara Steven Bergwijn ay doonayaan kooxo badan iyadoo Manchester United ka mid tahay lixda kooxood ee lala xiriirinayo.
Seddex kooxood oo ka dhisan Premier League ayaa lagu soo waramayaa inay ku biireen dagaalka loogu jiro xiddiga kooxda PSV Eindhoven ee Steven Bergwijn.
21 jirkan ayaa dhaliyay 11 gool, waxaana uu sameeyay 12 caawin 24 kulan oo uu u saftay horyaalka Holland xilli ciyaareedkan si uu uga caawiyo kooxdiisa inay hoggaanka ku heyso shan dhibcood.
Bergwijn ayaa ku biiray kooxda koowaad ee PSV sannadkii 2015, waxaana lagu abaalmariyay qaab ciyaareedkiisa cajiibka ah ee sannadkii hore markii looga yeeray xulka qaranka Holland, isagoo si fiican ugu soo baxay kulamadii Germany iyo France ee UEFA Nations League.
Eindhoven ayaa haatan isku diyaarinaya dalabyo waaweyn oo ugu imaanaya kooxo dhowr ah oo doonaya weeraryahanka tayada leh iyadoo wargeyska De Telegraph uu tibaaxay in lix kooxood ay heshiis soo bandhigeen.
Liverpool, Manchester United iyo Tottenham Hotspur ayaa lagu soo waramayaa inay ku dagaalamayaan saxiixa Bergwijn halka Bayern Munich, Borussia Dortmund iyo Inter Milan ay sidoo kale xilli ciyaareedkan daawasho ku hayeen ciyaaryahanka.
