Radio Himilo
Himilo – Manchester United ayaa lagu soo waramayaa inay diiradda saarayso saxiixa khadka dhexe ee kooxda Aston Villa Jack Grealish xagaagan iyada oo cayaaryahanka Leicester City ee James Maddison uu ku dhaw yahay in uu qandaraas cusub u saxiixo kooxdiisa.
Kooxda tababare Ole Gunnar Solskjaer ayaa lala xiriiriyay u dhaqaaqista labada cayaaryahan dhowrkii billood ee ugu danbeysay iyada oo dooneysa inay xoojiso khadkeeda dhexe.
Sida laga soo xigtay Daily Mail, Grealish ayaa immika u muuqda bartilmaameedka koowaad ee Man United iyada oo laacibkan uu dhaliyay sagaal gool halka uu caawiyay shan kale xagaagan.
Wararka ayaa intaa raacinaya in la filan karo dalabaadka kooxo kale sida Tottenham Hotspur oo mar ku dhawaatay saxiixa Grealish sannadkii 2018-ka.
Maddson ayaa sidoo kale lala xiriiriyay u dhaqaaqista Old Trafford hase ahaatee United ayaa ka baqdin qabta in cayaaryahanka uu ku dhaw yahay in uu qandaraas cusub u saxiixo kooxda ku cayaarta garoonka King Power Stadium.
Man United ayaa xaqiijisay saxiixa khadka dhexe ee Bruno Fernandes intii lagu guda jiray suuq furanka bishii Janaayo balse waxay hadda ka cabsi qabtaa in Paul Pogba uu kooxda ka tagi karo xagaagan.
