Miyaa la siin karaa Liverpool koobka Pl-ka haddii aan la dhammeyn cayaaraha dhimman?

Himilo – Liverpool ayaa la soo warinayaa in la guddoonsiinayo koobka horyaalka Ingiriiska xilli cayaareedka 2019-2020 xattaa haddii aan dib loo billaabin sabab la xiriirta caabuqa Corona.

Jimcaddii shalay, waxaa lagu dhawaaqay in horyaalka Ingiriiska aan la cayaari doonin labada toddobaad ee soo socota sabab ku saabsan caabuqa Corona.

Sida hadda tahay, waxaa la filayaa in dib loo cayaaro horraanta April laakiin waxaa jira walaac badan oo laga qabo in la dhammeystiro cayaaraha xilli cayaareedkan.

Liverpool ayaa hadda 25 dhibcood ku hoggaamineysa horyaalka Ingiriiska laakiin wli xisaab ahaan ma aysan xaqiijin koobka.

Sida laga soo xigtay The Telegraph, Liverpool ayaa la filayaa in la siiyo koobka horyaalka xattaa haddii aan la dhammeyn cayaaraha horyaalka.