Solskjaer oo sheegay in Ighalo uu heysto fursad uu ku sii joogi karo Old Trafford

Himilo – Ole Gunnar Solskjaer ayaa sheegay in weeraryahanka Odion Ighalo uu sameyn karo in uu qandaraas joogto ah ka helo kooxda Manchester United.

Laacibkii hore ee qaranka Nigeria ayaa United kaga soo biiray kooxda ka dhisan Shiinaha ee Shanghai Shenhua maalintii ugu danbeysay ee suuq furanka bishii Janaayo.

Ighalo ayaa la doonayaa in uu beddal ku-meel-gaar ah u noqdo weeraryahanka Marcus Rashford oo ku maqan dhaawac balse Solskjaer ayaa ka dhawaajiyay in 30 jirka uu sii joogi karo garoonka Old Trafford wixii ka danbeeya xagaaga.

“Waa heshiis ammaah ah, laakiin marka aad daaqadda joogto, oo aad cajab geliso dadka, waxay ku siineysaa fursad,” ayuu yiri tababaraha Man United.

Shaki badan ayaa laga muujinayaa in Ighalo lagu soo billaabo cayaarta United ay kaga hor imaaneyso caawa kooxda Chelsea.