Himilo – Mas’uuliyiinta garoonka diyaaradaha Caselle ee magaalada Turin ee Talyaaniga ayaa boorsada nin Talyaani ah ka helay madaxa yaxaas ka tirsan noocyada dabar-go’aya, waxaana ninkaasi lagu sameynayaa baaritaan ku saabsan tahriibinta xayawaanka la ilaaliyo.
Booliska maaliyadda ee Turin ayaa sheegay in ninku ka yimid Miami, isagoo sii maray Istanbul, waxaana madaxa yaxaaska lagu helay kadib markii la baaray boorsadiisa. Hay’adaha canshuuraha iyo booliska maaliyadda ayaa xoojiyay baaritaannada la xiriira ganacsiga noocyada xayawaanka la ilaaliyo iyo kuwa dabar-go’aya.
Mas’uuliyiintu waxay sheegeen in madaxa yaxaasku la qalajiyay oo lagu duubay warqad caadi ah, taas oo u sahashay inuu ka gudbo baaritaannadii safarka. Madaxa ayaa lala wareegay, halka ninka lagu baarayo inuu dalka soo geliyay nooc xayawaan oo la ilaaliyo isaga oo aan haysan shahaado ama ruqsad sharci ah.
Haddii lagu helo dambiga, ninka ayaa wajahaya ganaax u dhexeeya 20,000 ilaa 200,000 oo Yuuro, ama xabsi u dhexeeya lix bilood ilaa hal sano.
Yaxaasyada waxaa ilaaliya Heshiiska Washington ee CITES, oo ah heshiis caalami ah oo la saxiixay 1973, kaas oo looga gol leeyahay in lagu ilaaliyo dhirta iyo xayawaannada dabar-go’aya, lagana hortago ganacsigooda sharci-darrada ah.
Talyaaniga ayaa lagu tilmaamaa marin muhiim u ah ganacsiga sharci-darrada ah ee xayawaanka qalaad, oo qayb ka mid ah ay ku lug leeyihiin kooxo dambiilayaal abaabulan. Si kastaba, waxaa sidoo kale jira dalxiisayaal qaata waxyaabo ay xusuus ahaan u soo iibsadaan, sida madax yaxaas oo la qalajiyay, iyaga oo aan ogeyn in sharcigu mamnuucayo. Madax yaxaasyada noocan ah ayaa si caadi ah looga heli karaa qaar ka mid ah dukaamada xusuusta ee Florida.