Radio Himilo
Himilo – Hay’adda Qaramada Midoobay u qaabilsan qaxootiga Falastiin (UNRWA) ayaa Axaddii sheegtay in xaaladda bini’aadantinimo ee ka jirta Marinka Gaza ay tahay “mid ka baxsan mala-awaalka,” iyadoo Israa’iil sii waddo xanibista raashinka iyo agabka kale ee nolosha muhiimka u ah.
“Iyadoo go’doonka buuxa ee sahayda aasaasiga ah uu galay toddobaadkiisii sagaalaad, waxaa lama huraan ah in beesha caalamku si wadajir ah uga hortagto masiibadan bini’aadantinimo ka hor inta aysan gaarin heer hor leh oo aan horey loo arag,” ayay hay’addu ku tiri bayaan ay soo saartay.
UNRWA waxay markale ku celisay baaqeeda ku aaddan in si degdeg ah loo joojiyo dagaalka Gaza.
Xaaladda ayaa cirka isku sii shareertay kadib markii Israa’iil ay si keligood ah uga baxday heshiis xabbad-joojin iyo is-weydaarsi maxaabiis oo la gaaray kooxda iska caabinta Falastiiniyiinta ee Xamaas bishii Janaayo 2024.
Jimcihii, madaxa UNRWA Philippe Lazzarini ayaa digniin ka bixiyay in maalin kasta oo go’doonka Israa’iil sii socdo uu si aamusnaan ah u dilayo caruur iyo haween dheeraad ah — marka laga reebo kuwa lagu dilayo duqeymaha tooska ah.
Khamiistii, Ismaaciil Al-Thawabta, agaasimaha xafiiska warbaahinta dowladda Gaza, ayaa u sheegay wakaaladda Anadolu in Gaza ay gashay “heer sare oo macaluul ah” sababo la xiriira xirnaanshaha guud ee xuduudaha tan iyo 2-dii Maarso iyo weerarka cusub ee Israa’iil.
Ilaa iyo hadda, in ka badan 52,500 Falastiiniyiin ah ayaa lagu dilay weerarka Israa’iil tan iyo Oktoobar 2023, badankoodna waa haween iyo carruur.
