Himilo – Chelsea ayaa qarka u saaran inay weydo saxiixa da ‘yarka Paris Saint-Germain Kays Ruiz-Atil.
19 jirkaan ayaa loo gacan geliyay dhowr fursadood oo Ligue 1 ah intii uu joogay tababaraha haatan ee Blues Thomas Tuchel, laakiin ma uusan u ciyaarin PSG hal daqiiqo oo kubada cagta ah ka dib markii Mauricio Pochettino uu la wareegay xukunka.
Ruiz-Atil ayaa sidaa darteed qarka u saaran inuu ka tago PSG marka heshiiskiisa uu dhaco maalmo yar gudahood, waxaana Chelsea loo saadaaliyay inay Ruiz-Atil keeni doonto Stamford Bridge horaantii sanadkaan si da ‘yarkaan uu u sii wato horumarkiisa intii uu ka hoos ciyaarayo Tuchel.
Si kastaba ha noqotee, saxafiga Calciomercato Matteo Moretto ayaa sheegaya in Barcelona ay ku dhowdahay heshiiska Ruiz-Atil, kaasoo lix sano ku qaatay akadeemiyada Catalans ee La Masia intii u dhaxeysay 2009 iyo 2015.
Da’yarkan ayaa hore waqti ula soo qaatay Gerland iyo kooxaha dhalinyarada ee Lyon ka hor inta uusan ku biirin akadeemiyada Barcelona, wuxuuna qalinka ku duugay heshiis xirfad leh kooxda PSG shan maalmood ka dib markii uu 16 jirsaday 2018.
Ruiz-Atil ayaa ka tagaya PSG ka dib markii uu saftay todobo kulan oo Ligue 1 ah xilli ciyaareedkii 2020-21, oo ay ku jirto mid uu ku soo bilowday kulankii furitaanka ee ay guuldarada kala kulmeen Lens.