Himilo – AC Milan ayaa ka fiirsaneyso inay heshiis is dhaafsi ah la gasho Liverpool oo ku lug leh Thiago Alcantara iyo Franck Kessie.
Heshiiska Kessie ee San Siro ayaa lagu wadaa inuu dhaco dhamaadka ololaha hadda, ciyaaryahanka khadka dhexe ayaa ilaa iyo haatan ka soo horjeestay isku daygii Rossoneri ee ahaa inay ku xiraan qandaraas cusub.
Sidaas darteed, kooxda Stefano Pioli ayaa halis ugu jirta inay Kessie beeca xorta ah ku weydo xagaaga dambe, maadaama xiddiga heerka caalami ee reer Ivory Coast uu heshiis hordhac ah la saxiixi karo kooxaha kale laga bilaabo Janaayo.
Sida laga soo xigtay Il Milanista, agaasimayaasha Milan Frederic Massara iyo Paolo Maldini ayaa doonaya inay ka fogaadaan inay Kessie ku waayaan si xor ah iyagoo heshiis isdhaafsi ah la galaya Liverpool oo ku lug leh Thiago.
Ciyaaryahankii hore ee Bayern Munich ayay ku adkaatay inuu muujiyo qaab ciyaareedkiisii ugu fiicnaa intii lagu jiray ololihiisii ugu horreeyay ee Anfield, isagoo diiwaangeliyay gool keli ah 30 kulan oo uu saftay tartammada oo dhan xilli ciyaareedkii hore.
Liverpool iyo Milan ayaa dib u soo cusbooneysiin doona colaadda Arbacada Champions League Group B – waa kulankii ugu horreeyey ee ay labadan naadi kulmaan tan iyo finalkii 2007 -dii ee tartankii Yurub.