Radio Himilo
Himilo – Ra’iisul Wasaaraha Hindiya Narendra Modi ayaa si rasmi ah u daahfuray buundada tareenka ugu dheer caalamka oo laga dhisay togga Chenab ee ku yaalla gobolka lagu muransan yahay ee Jammu iyo Kashmiir, taas oo qeyb ka ah mashruuc weyn oo xoojinaya isku socodka gobolka iyo qeybaha kale ee dalka.
Buundadan, oo loo yaqaan Chenab Rail Bridge, ayaa ah buundada ugu dheer ee tareenka adduunka, iyadoo dhererkeedu yahay 359 mitir oo ka sarreeya togga Chenab – taas oo 35 mitir ka dheer Tower-ka Eiffel ee Faransiiska. Buundadan ayaa loo dhisay si ay u adkeysato dhulgariirro iyo dabaylo xoog leh, iyadoo loo arko mid ka mid ah guulaha ugu waaweyn ee farsamada ee Hindiya.
Mashruuca tareenka oo dhan ayaa gaaraya 272 km (169 mayl), waxaana lagu bixin doonaa in ka badan 437.8 bilyan oo rupees Hindi ah (ku dhawaad $5.11 bilyan). Mashruucu wuxuu ka kooban yahay 36 tunnel iyo 943 buundooyin, wuxuuna hoos u dhigi doonaa waqtiga safarka ee u dhaxeeya Kashmir iyo caasimadda Delhi ilaa 3 saacadood.
Ra’iisul Wasaaraha ayaa booqday buundada Chenab isagoo ka soo dagay saldhigga ciidamada cirka ee Udhampur, taasoo noqoneysa booqashadiisii ugu horreysay ee gobolka tan iyo weerarkii ka dhacay Pahalgam bishii April, kaasoo lagu dilay 26 qof.
Mashaariicdan ayaa lagu tilmaamay kuwo xoojinaya isku xirka dhaqaale, amni, iyo horumarineed ee gobolka Kashmiir, xilli xiisado siyaasadeed iyo kuwo amni ay wali ka taagan yihiin gobolkaasi.
