Radio Himilo
Himilo – Kabtanka Manchester United Harry Maguire ayaa diyaar u noqon karo kulanka Premier League ee ay galabta Sabtida la ciyaarayaan Leicester City.
28 jirkaan ayaa dhibaato ka soo gaartay kubka intii ay guuldarrada ka soo gaartay Aston Villa 25-kii September, taasoo ka reebtay inuu ciyaaro kulamadii Villarreal iyo Everton.
Maguire markii hore lama filayn inuu soo laaban doono ilaa dabayaaqada bisha Oktoobar, laakiin sida laga soo xigtay Manchester Evening News, daafaca dhexe ayaa laga yaabaa inuu safto si uu uga soo muuqdo King Power Stadium.
Xiddiga heerka caalami ee dalka England ayaa inta badan ka garab ciyaaray Raphael Varane wadnaha afarta dambe xilli ciyaareedkan tan iyo markii uu ka yimid Real Madrid.
Varane ayaa shaki la geliyay kulanka Sabtida ay la ciyaarayaan Leicester, inkastoo xiddiga ku guuleystay Koobka Adduunka uu dhaawac bowdada ka soo gaaray isagoo matalaya France finalka UEFA Nations League.
Marcus Rashford ayaa ku soo laabtay tababarka buuxa, dhanka kale, xiddiga reer England ayaa u tartamaya inuu safto kulankiisii ugu horeysay ee xilli ciyaareedkan isbuucaan.
