Radio Himilo
Muqdisho – Calciomercato ayaa fahamsan in Juventus ay qorsheyneyso in ay kulan la yeelato wakiilka Mino Raiola ee laacibka Holland iyo Ajax Matthijs De Ligt, iyagoo doonaya inay ku garaacaan Barcelona tartanka loogu jiro laacibkaan.
Xiddiga da’da yar ayaa u ciyaaray xulka tababare Ronald Koeman ee Netherlands shalayto, waxaana uu ka mid ahaa ciyaartoydii ugu fiicneyd garoonka, isagoo ka caawiyay Holland inay 2-0 kaga garaacdo ku guuleystiyasha Koobka Adduunka France.
Majaladda Sport ee kasoo baxda Catalan, ayaa sheegeysa in madaxda Barcelona iyo madaxda kooxda ay kulmeen shalay, si ay u dhameystirto qorshe ay kula saxiixaneyso De Ligt.
Laakiin Calciomercato ayaa fahamsan in Juventus ay haatan qorsheyneyso inay kulan la yeelato Raiola maalmaha soo socda, madaama ay doonayaan inay tartan adag la galaan Barcelona tartanka loogu jiro daafacan.
Kooxda Ajax ayaa barbaarkaan ku qiimeyneyso qiyaastii 70 milyan euro, mana aqbali doonto wax dalab ah oo ka hooseeya qiimaasi.
Juventus ayaa xiriir dhow la leh Raiola, waxaana ay dareensan tahay inuu ka caawin karo inay soo xero geliyaan De Ligt, kaasi oo horey u booqday tababarka kooxda horaantii sannadkan.
Barcelona ayaa diyaarisay dhaqaalle loogu talagalay ciyaaryahanka, iyadoo Manchester City iyo Tottenham ay sidoo kale diyaar yihiin.
