Radio Himilo
Himilo – Sadio Mane ayaa loo magacaabay ciyaaryahanka sannadka ee qaaradda Afrika ee 2019 Confederation of African Football’s Player of the Year.
Weeraryahanka reer Senegal ayaa ku garaacay abaal-marintan laacibka ay isku kooxda yihiin ee Mohamed Salah- oo horay u qaaday sannadihii 2017 iyo 2018 iyo weeraryahanka Man City Riyad Mahrez.
Codadka abaal-marinta ayaa laga qaaday tababarayaal, agaasimayaasha farsamo iyo kabtanada ururada Afrika ee kubadda cagta.
Mane oo ku guddoomay abaal-marinta xaflad lagu qabtay Masar ayaa yiri “ kubadda cagta waa shaqadeyda, waan jeclahay. Xaqiiqdii, waan faraxsanahay aniga oo ku faanaya abaal-marinta.”
Waxa uu intaa raaciyay “Waxaan jeclahay in aan u mahadceliyo qoyskeyga, gaar ahaan adeerkay oo halkan jooga, kooxdeyda qaranka, asxaabteyda Liverpool, shaqaalaha iyo qof kasta.”
Ciyaaryahanka 27 jirka ah ayaa dalkiisa Senegal ka caawiyay in uu gaaro final-ka koobka qaramada Afrika ee Africa Cup of Nations.
Waxaa intaa dheer in Mane uu kula guuleystay kooxdiisa Liverpool koobka Champions League xilli ciyaareedkii 2018-2019 isaga oo billada Golden Boot ee Horyaalka Ingiriiska la qeybsaday ciyaaryahanada Afrika ee Salah iyo Pierre-Emerick Aubameyang.
