Radio Himilo
Himilo – Hay’adda Human Rights Watch (HRW) ayaa Khamiistii ku eedeysay Israa’iil inay gashay dambiyo dagaal, kadib markii ay 23-kii Juun 2025 duqeysay xabsiga Evin ee magaalada Tehran, duqeyn ay ku tilmaantay mid sharci-darro ah oo aan loo meel dayin.
Duqeymaha ayaa lagu dilay ugu yaraan 80 qof oo ay ku jiraan maxaabiis, ehelkooda iyo shaqaalaha xabsiga, sida ay sheegeen ilo dowladda Iran ah. Ma jirin bartilmaameed ciidan oo muuqda waqtiga weerarka, iyadoo duqeyntu dhacday saacadaha ay eheladu booqanayeen maxaabiista, taas oo dhaawac weyn u geysatay qolalka booqashada, jikada dhexe, xarunta caafimaadka iyo qaybaha ay ku jiraan maxaabiista siyaasadeed.
Xabsiga Evin, oo caan ku ah in lagu xiro mucaaradka iyo u-doodayaasha xuquuqda aadanaha, ayaa markaas waxaa ku jiray in ka badan 1,500 maxbuus. HRW ayaa sheegtay inay la xiriirtay mas’uuliyiinta Iran iyo Israa’iil 2-dii iyo 7-dii Luulyo balse aysan helin jawaab waxtar leh.
Weerarkan ayaa qeyb ka ah duqaymo xooggan oo ka dhacay inta u dhexeysay 13-25 Juun, kuwaas oo sidoo kale ay ku jireen weerarro gantaallo ballaastiig ah oo Iran ku qaaday Israa’iil. Marqaatiyaal, sawirro dayax-gacmeed iyo muuqaallo ayaa xaqiijiyay in duqeymuhu burburiyeen dhismayaal kala fog oo badan, taas oo muujinaysa sida aan loo kala soocin weerarka.
