Radio Himilo
Himilo – Hay’adaha gurmadka ee Indonesia ayaa ku dhibtoonaya inay gaaraan dadka ku waxyeelloobay fatahaadaha iyo dhulgo’yo ka dhacay jasiiradda Sumatra, iyadoo tirada dhimashada ee la xaqiijiyay ay gaartay 248 qof, ciidamada gurmadkuna ay ka baqayaan in khasaaruhu sii kordho.
Roobab mahiigaan ah oo toddobaadkan da’ay ayaa sababay in webiyada ay ka soo fatahaan waqooyiga Sumatra, taas oo daadad xooggan ku dhufteen tuulooyin buuraley ah, kuwaas oo dad iyo guryo badan. Hay’adda Qaranka ee Maareynta Musiibooyinka (BNPB) ayaa sheegtay in in ka badan 500 qof ay ku dhaawacmeen, halka ku dhowaad 3,000 qoys ay u barakaceen xeryaha dowladda.
Gargaarka degdegga ah ayaa wali caqabad weyn ku ah maamulka, iyadoo wadooyin burburay, isgaarsiin go’an, iyo buundooyin dumay ay adkaynayaan in la helo dadka ka badbaaday. Baabuur culus oo lagu baadigoobo dad weli ku duugan dhoobo, gaar ahaan gobolka Agam ee Galbeedka Sumatra, halkaas oo meydad hor leh laga soo saaray, tiraduna ay halkaas ka gaaray 74 qof, iyadoo wali 78 qof laga la’yahay saddex tuulo oo ku yaalla Agam.
Warbaahinta gudaha ayaa baahisay muuqaal dad qaraabo ah oo ooyaya, iyagoo arkaya gurmadayaal meydadka oo dhoobo ku dheggan laga soo saarayo. Deegaannada gobolka Aceh ayaa sidoo kale ka mid ah meelaha ugu daran, halkaas oo daadad culus ay jareen, kuna adkeeyeen gaarsiinta raashin, biyaha nadiifta ah, shidaalka iyo agabka gargaarka. Gobolka Aceh waxaa loo geliyay xaalad degdeg ah ilaa 10-ka Diseembar.
Sidoo kale, warbaahinta maxalliga ah ayaa sheegay in fatahaadaha ku dhuftay degmada Bireuen ee Aceh ay dumisay 9 buundo, taas oo hakisay isu socodka u dhexeeya Medan iyo Banda Aceh, ayna qasab ka dhigtay dadka inay ku kala gudbaan doomo yar yar.
Indonesia ayaa si joogto ah u la kulanta masiibooyin dabiici ah, taas oo keenta dhulgariir, foolkaanayaal qarxa iyo tsunamiyo.
