Radio Himilo
Himilo – Ciyaaryahanka heerka caalami ee dalka England ayaa si weyn uga dhex muuqday kooxda Manchester City xilligii Pep Guardiola ee Etihad Stadium, laakiin heshiiskiisa ayaa dhacaya dhamaadka xilli ciyaareedkan.
John Stones iyo Manchester City ayaa qarka u saaran inay wadahadalo furaan si ay u arkaan xiddiga England inuu sii dheereysto waqtigiisa Etihad Stadium.
Stones, oo tiir-dhexaad u ah hanashada koobabka Pep Guardiola ee Manchester, ayaa qandaraaskiisu dhacayaa dhamaadka xilli ciyaareedkan. Laakiin isaga iyo Guardiola labaduba waxay doonayaan inay kordhiyaan sii joogistiisa kooxda – xilli Erling Haaland loo sheegay inuu noqon karo gooldhaliyaha abid ugu sarreeya Premier League haddii uu ku sii jiro Etihad.
Stones, oo 31 jir ah, ayaa wada xaajood la bilaabi doona madaxda City, waxaana uu ku rajo weyn yahay inuu ogolaado heshiis ku sii hayn doona kooxda ilaa 2028.
Stones ayaa doonaya inuu ka sii mid ahaado kooxda, waxaana uu u ballan qaaday sanadaha ka harsan xirfadiisa ciyaareed in uu joogo, halka gudoomiyaha City Khaldoon Al-Mubarak uu aad ugu baahan yahay inuu ka fogaado inuu Stones ku lumiyo beeca xorta ah xagaaga soo aadan.
Stones ayaa City kaga soo biiray Everton heshiis 48 milyan ginni ah 2016-kii, wuxuuna kula guuleystay 15 koob oo waaweyn oo ay ku jiraan lix horyaal oo Premier League ah. Wuxuu sidoo kale qayb weyn ka ahaa guushii taariikhiga ahayd ee Treble ee 2023.
Waxa uu kooxda u saftay 281 kulan – sidoo kale waxa ku guulaystay 83 kulan oo England ah tan iyo kulankiisii ugu horeeyay ee caalamiga ah 2014-kii.
Stones ayaa lagu qasbay inuu ka baxo kooxdii ugu dambeysay ee England dhaawac dartiis, laakiin waxaa la filayaa inuu ka mid noqdo xulka Thomas Tuchel ee Koobka Adduunka, waa haddii saddexda libaax ay u soo baxaan finalka xagaaga soo socda ee USA, Mexico iyo Canada ka qabsoomaya.
