Magaalada Gaza oo la xajiijiyay inay ka jirto macaluul rasmi ah oo ku faafaysa deegaannada kale ee marinka

Warbixinta IPC ayaa sheegtay in macaluushu ka dhalatay dagaalka, xannibaadda gargaarka bani’aadannimo iyo burburka wax soo saarka cuntada gudaha, taas oo gaarsiisay gaajada heer dhimasho halis ah dhulka oo dhan kaddib 22 bilood oo dagaal ah.

IPC waxay ka digtay in haddii aan la helin xabbad-joojin iyo in xannibaadda gargaarka la qaado, macaluushu ay gaari karto gobollada Deir al-Balah iyo Khan Younis dhammaadka bisha soo socota.

Qiyaastii nus milyan qof — oo u dhiganta rubuc ka mid ah dadka Gaza — ayaa wajahaya heerar gaajo oo masiibo ah, iyadoo carruur badan halis ugu jiraan dhimasho la xiriirta nafaqo-darro.

Inkasta oo sawirro carruur nafaqo-darro daran la daabacay iyo dhimashooyin la xiriira gaajo la soo sheegay, haddana Ra’iisul Wasaaraha Israa’iil Benjamin Netanyahu ayaa ku tilmaamay warbixinta macaluusha “been uu faafiyey Xamaas”. Israel waxay sheegtay inay fududeysay in gargaar dheeraad ah la geliyo, balse Qaramada Midoobay iyo Falastiiniyiintu waxay sheegeen in waxa gudaha la gelinayo ay ka hooseeyaan baahida dhabta ah.

Xaqiijinta xaalad macaluul rasmi ah waa arrin dhif ah oo ku dhacda marka saddex shuruudood la caddeeyo:

• Ugu yaraan 20% qoysaska oo si aad ah u gaajeysan.

• Ugu yaraan 30% carruurta da’da lix bilood ilaa shan sano oo qaba nafaqo-xumo daran.

• Laba qof ama afar carruur ah oo ka yar shan sano oo maalin kasta ku dhinta toban kun qofba.

IPC waxay horey macaluul uga xaqiijisay Soomaaliya sanadkii 2011, Koonfurta Suudaan sanadihii 2017 iyo 2020, iyo qaybo ka mid ah Darfur sanadkii hore.

Khabiir Alex de Waal, oo ah qoraaga buugga Mass Starvation: The History and Future of Famine, ayaa sheegay in haddii Israel ay ogolaan lahayd helitaanka xog dhameystiran, macaluusha la xaqiijin lahaa bilihii hore, taas oo kor u qaadi lahayd cadaadiska caalamiga ah.