Radio Himilo
Himilo – Ruushka iyo Ukraine ayaa bilaabay is-weydaarsi maxaabiis ballaaran Jimcihii, iyagoo mid walba sii daayay 270 askari iyo 120 maxbuus rayid ah, sida ay sheegeen labada dhinac.
Madaxweynaha Ukraine Volodymyr Zelenskyy ayaa sheegay in wajiga koowaad ee is-weydaarsigu uu keenay 390 Ukrainians oo dalkooda dib loogu soo celiyay.
“Waa arrin aad muhiim u ah in la keeno qof walba oo maxbuus ah gurigooda,” ayuu ku qoray bartiisa Telegram, isagoo uga mahadceliyay cid walba oo dadaalka ku bixisay arrintan.
Wasaaradda Gaashaandhigga Ruushka waxay sheegtay in is-weydaarsiga sii socon doono maalmaha soo socda, iyadoo tirada guud ee la filayo inay gaarto 1,000 maxbuus oo dhinac walba ah, taasoo lagu heshiiyay kulan kooban oo Istanbul lagu qabtay toddobaadkii hore.
Inkasta oo kulankii Turkiga uusan keenin xabad joojin, haddana is-weydaarsiga maxaabiista ayaa ah mid ka mid ah calaamadaha yar ee muujinaya in wadahadallo toos ah ay socdaan, inkasta oo ay weli socoto dagaalkii saddex sano jirsaday ee u dhexeeya labada dal.
