Radio Himilo
Himilo – Xisbiga talada haya ee Uganda, National Resistance Movement (NRM), ayaa si rasmi ah u ansixiyay Madaxweyne Yoweri Museveni inuu noqdo musharaxooda rasmiga ah doorashada madaxtinimada ee dhici doonta Janaayo 2026, taas oo noqon doonta muddo-xileedkiisii toddobaad.
Museveni oo 80 jir ah ayaa aqbalay musharaxnimada Arbacadii, isagoo khudbad ka jeediyay shirweynaha xisbiga ee ka dhacay Kampala. Wuxuu u mahadceliyay xubnaha NRM kalsoonida ay mar kale u muujiyeen, isagoo ku faanay waxqabadka xisbigiisa, gaar ahaan dib-u-soo-kabashada dhaqaalaha Uganda.
Museveni ayaa markii ugu horreysay xilka la wareegay 1986 isagoo hoggaaminaya jabhad hubeysan, wuxuuna tan iyo markaas lix jeer ku guuleystay doorashooyinka, kadib markii dastuurka laga saaray xadidaadda muddo-xileedka iyo da’da madaxweynaha. Haddii uu guuleysto Janaayo, xilkiisa ayaa gaari doona ku dhowaad 50 sano.
Mucaaradka iyo Caqabadaha
Mucaaradka gudaha Uganda ayaa ku eedeeya Museveni inuu noqday kaligii-taliye aan tartan dhab ah lahayn, xitaa xisbiga NRM gudihiisa. Museveni ayaa dhaleeceynta muddada dheer ee uu xilka hayo ku difaaca in uu mar kasta dib loo soo doorto shan sanaba mar.
Mucaaradkiisa ugu weyn doorashadii hore wuxuu ahaa fannaan- siyaasiga noqday Bobi Wine, oo 43 jir ah, kaasoo sidoo kale ku dhawaaqay inuu musharax yahay 2026. Wine ayaa doorashadii 2021 kaga guuldarreystay Museveni natiijo ahayd 58% ilaa 35%, balse doorashadaasi waxaa hareeyay rabshado iyo eedo musuq.
Wine ayaa sheegay in xaaladda siyaasadeed ee Uganda ay ka sii dareyso, isagoo ku tilmaamay inuu wajahayo hanjabaado joogto ah isaga iyo taageerayaashiisa.
