Radio Himilo
Himilo – Wasaaradda Caafimaadka ee Marinka Gaza ayaa sheegtay in shan qof oo Falastiiniyiin ah ay gaajo ugu dhinteen 24-kii saac ee la soo dhaafay, taasoo tirada guud ee dadka gaajada ugu dhintay Gaza tan iyo bishii Oktoobar 2023 ka dhigeysa 193 qof.
Bayaan kasoo baxay wasaaradda ayaa lagu sheegay in 96 ka mid ah dadka dhintay ay yihiin carruur.
Israa’iil ayaa cunaqabatayn saartay Marinka Gaza muddo 18 sano ah, waxayna gebi ahaanba xirtay dhammaan marinnadii gargaarka tan iyo 2-dii Maarso, taas oo si wayn u xumeysay xaaladda nolosha ee 2.4 milyan oo qof ee ku nool deegaanka.
Xafiiska Warbaahinta Dowladda Gaza ayaa sheegay in Israa’iil ay ogolaatay in ay gudaha u galaan kaliya 843 gaari oo gargaar ah tan iyo 27-dii Luulyo, taasoo aad uga yar baahida dhabta ah ee ah 6,000 gaari gargaar ah muddo 10 maalmood ah.
Dagaalka Israel ee Gaza oo billowday bishii Oktoobar 2023 ayaa sababay dhimashada in ka badan 61,000 oo Falastiiniyiin ah, badankoodna ay yihiin haween iyo carruur. Weerarrada ayaa burburiyey kaabeyaasha nolosha Gaza, waxayna dadka deggan u dhigeen halis macluul.
