Radio Himilo
Himilo – Hay’adda Palestinian Return Centre (PRC) oo fadhigeedu yahay UK, kana mid ah hay’adaha la-talin gaar ah la leh Golaha Dhaqaalaha iyo Bulshada ee Qaramada Midoobay (ECOSOC), ayaa soo gudbiyay markhaatiyo la xiriira jirdil iyo dhibaatooyin baahsan oo loo geystay maxaabiista Falastiiniyiinta tan iyo 7-dii Oktoobar 2023.
Warbixinta PRC ayaa ku saleysan dukumeenti uu diyaariyey qareen Khaled Mahajneh, oo ka tirsan guddiga maamulka maxaabiista ee Falastiin. PRC waxay sheegtay in dhacdooyinkan ay muujinayaan kor u kac halis ah oo ku saabsan jirdil nidaamsan iyo daryeel la’aan sharci darro ah.
Hababka lagu jirdilay maxaabiista ayaa lagu sheegay garaacid daran, gaajeyn ula kac ah, xabsi lagu hayo xaalado xanuun badan, daryeel caafimaad la’aan sababtay dhimasho, weerarro ay sameeyaan eeyaha, iyo xubno la jaray iyadoo aan la siin karin xanuun baabi’iye.
Sidoo kale, hay’addu waxay xustay dhacdo la caddeeyay oo la xiriirta kufsi uu geystay askari Israeli ah gudaha xabsiga. Warbixinta waxaa sidoo kale xaqiijiyay hay’ado xuquuqda aadanaha u dooda oo caalami ah sida Physicians for Human Rights–Israel iyo B’Tselem.
Dadka maxaabiista ah ee laga qabtay Qaza ayaa la sheegay in lagu hayo xeryo ciidan oo qarsoodi ah sida Anatot iyo Sde Teiman, kuwaasoo aan lahayn kormeer sharci ah. Maxaabiistana waxaa laga hor istaagay inay helaan qareeno ama la kulmaan Guddiga ICRC.
PRC waxay ku eedeysay Israel inay adeegsato magacyo siyaasadeed sida “dagaalyahan aan sharciyeysneyn” iyo “argagixiso” si ay uga baxsato ilaalinta sharciga caalamiga ah ee maxaabiista.
Hay’addu waxay ugu baaqday in si degdeg ah loo sameeyo guddi caalami ah oo madaxbannaan oo baara jirdilka iyo kufsiga la sheegay, si loo daro dacwada socda ee Maxkamadda Dambiyada Caalamiga ah (ICC).
PRC waxay ugu dambeyn ugu baaqday beesha caalamka inay cadaadis saarto Israel si ay u ixtiraamto shuruucda caalamiga ah ee xuquuqda maxaabiista, iyadoo sheegtay in aamusnaanta ama cambaareyn aan waxba tarin ay la mid tahay “ka qaybgal siyaasadeed oo xumaan ah.”
